D0: Di Zèro

Pena montà sù in aèreo i me sałuda in catałan. Chisà cuanti pasejeri i credarà che 'l sia spagnòło. Intanto, i Catałani i pòrta in vòlta un tocheto de ła so łéngua. Sença saverlo ła zente ła sente sto parlar cuà.


"Che calcheduni el voria che 'l restase sarà sù" - penso mi.


Xe un caxo ma go el biłieto zało. Anca i cuèrzi-sediłi i xe załi. Maria cuanto zało.


"Che ironie. Pensar che i ło ga vietà. I ga vietà l'iluminaçion zała fra i cułuri de łe fontane pùbliche".


Ordine del governo centrale, ordine degli unionisti del Regno.


Rivà. "Ben trovà Catalunya" - penso vardando i cartèłi in dópia łéngua. Catałan e inglexe in bianco, spagnòło in zało. "E el catałan par sora".


Col pensier fo na careça a sta tèra che go conosù ani fa, bèła e spavalda e che dèso go visto rinàsare come na paveja che ła mete łe ałe. Barçelona l'è senpre capital par cultura e viaji. Dèso ła xe anca capital de un Stato novo, che 'l se ga dito indipendente ma 'l xe ncora soto el contròło del Stato vècio.


"No gavaria mai pensà" - se i me l'avese domandà du mixi fa - "de métar pie int'un teritòrio controłà co leji speciałi da un Stato distante... E in Euròpa po".


D'altra parte anca in Kosovo pena proclama l'independença, suito el Stato vècio el ga reagio co ła fòrça. Picae in vòlta calche fòto par ła canpagna ełetorałe ordenà dai altri. Ma xe scuro. Barçelona ła rèsta misterioxa. "Bona nit", bona nòte, vedaremo doman col ciaro.

Commenti