L'OCIO (VENETO) DE UN GRAN GENIO DEA SATIRA. VENEXIT

Una de le carateristiche che no i ne ga gnincora "robà" dopo dò secoli passadi soto paroni vari ze l'autoironia. Qua ne gavemo un esempio ilustre, co Alberto Veneziano, na gran penna prestada  ala vigneta satirica, che come tema g ai Veneti (ma anca el mondo moderno), visto co ocio bonario, certamente, ma che no concede sconti.

A volte le so vignete le fa pensar a un eversivo Grosz veneto, e non a caso na volta par scherzo ghe go dito che lo consideravo un artista "dadaista". Anca Grosz, vignetista satirico tedesco dei ani 20 amava i dadaisti.

L'impiria (imbuto)  la botilia che fa spesso da contorno de la scena ze na roba molto dadaista, par far un esempio. Anca el trato de penna ze molto simile a queo del grande artista. Ma Alberto el ne fa rider de le nostre debolezze senza la cativeria del tedesco.

El nostro Alberto presta la so atenzion ai fati, ai dati reali, a la vita quotidiana, comunque sempre senza far sconti, anca se spesso el descrive el mondo indipendentista veneto de cui el fa parte con grande partecipazion e convinzion.

Mi diria che questo jiuta la causa veneta più de tanti discorsi e dibatiti: el ze un specio, el libro, su la storia, la vita, de ieri e de ancò dei Veneti; un mezo par vedar i nostri difeti e fin che gavemo 'sta capacità straordinaria de auto analisi, gavemo un asso ne la manega par miliorar e afinar le nostre armi verso l'obietivo filal, che ze l'indipendenza, par ridiventar "paroni in casa nostra".

Mi son cressudo da zovane col "Linus" nea cartea dei libri de scola: bon, ciapando in man i dò libri de vignete (ricordo che questo ze el secondo, dopo "Fiera Indipendenza), me par de tornar in chei ani distanti, rapio dal mondo de un artista, che no ga gnenta da invidiar ai grandi che publicava Oreste Del Buono, el diretor dea rivista dea me gioventù (ormai sempre più distante, ohibò).

Chiedete ad Alberto Veneziano per l'invio del volume, costa solo 20 per ben 190 pagine meravigliose.

 (Millo Bozzolan)

Commenti